Wara diskussjonijiet li saru bejn il-Gvern u l-iżviluppaturi, il-Master Plan tal-Forti Chambray ġie mibdul sabiex jinkludi wkoll il-Kwartieri storiċi tal-perjodu Brittaniku f’Malta.
Din il-bidla fil-Master Plan tirrikonoxxi l-importanza storika u arkitettonika ta’ din il-binja, li tagħmel parti importanti mill-istorja ta’ Forti Chambray u mill-patrimonju kulturali u storiku ta’ Għawdex u Malta.
Permezz tad-diskussjonijiet li saru, il-Gvern u l-iżviluppaturi identifikaw il-ħtieġa li dawn l-istrutturi storiċi jiġu inklużi fil-pjan ġenerali għas-sit, sabiex il-valur tagħhom ikun ikkunsidrat fil-viżjoni futura ta’ Fort Chambray.
Dan l-iżvilupp juri l-importanza ta’ djalogu kontinwu bejn il-Gvern u s-settur privat, b’mod partikolari fejn jidħlu siti ta’ valur storiku u kulturali, sabiex il-proċess ta’ pjanar iqis kemm il-potenzjal tal-iżvilupp kif ukoll il-ħtieġa li jiġi rispettat il-wirt storiku.
Il-Gvern jibqa’ impenjat li, permezz ta’ kollaborazzjoni u diskussjoni kostruttiva, il-wirt storiku u kulturali ta’ pajjiżna jingħata l-kunsiderazzjoni mistħoqqa fil-pjanijiet għall-futur.
